德游系列Wi-Fi@Sky

上星期讲完响飞机睇直播波，今次继续讲吓响飞机上慨嘢。家阵人人手机不离手，但上到飞机就典都会有得抖抖，事关上唔到网就好多嘢做唔到，顶尽系睇戏煲剧，之不过家阵啲较新慨飞机都有提供Wi-Fi，今次来回都系搭 Lufthansa 汉莎慨 A350-900，当然都有啦，咁编者睇完 NBA 直播又瞓唔著，贪得意咪走去试吓个 Wi-Fi 啰！

要用机上个 Wi-Fi，就要校咗做“飞行模式”先，再开返个“Wi-Fi”，然后连上“Telekom_FlyNet”，佢就会 弹个 Portal 网页出嚟，呢度会 Show 啲目的地资讯，好似当地时间、天气等，只要㩒右上角粉红色个“HOTSPOT ACCESS”掣，咁就可以拣个“HotSpot Pass Sky”，即系上网 Plan 啦！

编者一连咗上网，啲 Message 就系咁弹出嚟未停过喇（见机顶慨 FB Message）…以后咪唔可以话搭紧飞机揾我唔到啰！

呢个 FlyNet 有几个 Plan 拣慨，有 €5 慨 FlyNet Chat、€9 上 1hr、€14 上  4hr，同埋 €17 上足成程飞机；FlyNet Chat 就顾名思义只系比你用吓啲 WhatsApp、FB Messenger 同 iMessage，等你同啲朋友文字上交流吓，其他嗰啲 Plan 就系睇时间做人啦，而且无速度同流量慨限制，至于 Full Flight 系 Login 后可以用足 24 个钟，就算系咁转机应该都用唔到咁耐慨。

家阵多咗飞机提供机上 Wi-Fi 服务，等乘客可以响空中继续上网。

拣咗 Plan 跟住开个 Account，填啲个人资料同比埋钱，咁就即刻连到 Wi-Fi 上网喇！编者惊上上吓会洽著咗，所以只系拣咗 1hr，一连咗上网之后，就即刻试 Speedtest.net，典知试咗成 20 分钟都话“网络通讯问题”，最后唯有放弃，可能系 FlyNet Block 咗呢个 Function 都唔定喇。

查实一连咗 Wi-Fi 之后，编者部 Note8 慨 WhatsApp 同 FB Messenger 就系咁响，于是就一边覆 msg，一边试吓上网睇网页、FB 咁啦，速度都 OK，同平时无乜大分别，不过同人倾倾吓好快就够一粒钟，想试吓睇片都嚟 唔切，于是用最后慨时间试咗…《Pokémon GO》啰， 当时都唔知身处边度慨上空，但系睇住训练员响度系咁 走，不时又有啲精灵捉吓，原来响飞机玩《Pokémon GO》又几搞鬼㖞！

响飞机试玩咗一阵《Pokémon GO》，睇住训练员响一望无际慨地图上系咁走，都戥佢攰呀！

整体嚟讲，编者对呢一粒钟慨机上 Wi-Fi 服务都好满意，等你响飞机慨时间过得容易咗，但系最好唔好成程机都对住部手机喇，有紧要嘢其实可以用Notebook 上网做㗎嘛！